Կազմակերպութեամբ Նոր Ջուղայի Հայ Մարզա-մշակութային «Արարատ» միութեան կենտրոնական վարչութեան, իրանահայ 27-րդ Գարնանային խաղերի հանդիսաւոր բացումը տեղի է ունենալու հինգշաբթի՝ մարտի 19-ի ժամը 19:00-ին, միութեան մարզասրահում: Խաղերին մասնակցելու յայտ են ներկայացրել Թեհրանի, Թաւրիզի, Ուրմիայի, Շահինշահրի եւ Նոր Ջուղայի շուրջ 250-մարզիկ-ուհիներ՝ իրենց մարզիչներով ու պատասխանատուներով: Մրցութիւնները կայանալու են ֆուտբոլ, բասկետբոլ եւ սեղանի թենիս մարզաճիւղերում՝ երէց եւ երիտասարդ տարիքային մակարդակում:
Նշելի է, որ նոյն օրը երեկոյեան, խաղերի խորհրդանշական ջահը, արդէն որպէս ձեւաւորւած աւանդոյթ՝ յատուկ արարողութեամբ վառւելու է Ս. Ամենափրկչեան վանքի շրջափակում վեր խոյացած Ապրիլեան եղեռնի բիւրաւոր նահատակների յիշատակը յաւերժացնող յուշակոթողի անմար կրակով:
Այս շրջանի խաղերը նւիրւած են Հայոց ցեղասպանութեան 100-ամեակին եւ տեւելու են մինչեւ մարտի 24-ը:
Ամենամեայ կարգով տեղի ունեցող Գարնանային մարզական փառատօնը իրականանում է միութեան Կենտրոնական վարչութեան, 27-րդ Գարնանային խաղերի կազմակերպիչ յանձնախմբի, բոլոր միաւորների, Կարգապահական կազմի ու անհատների անվերապահ համագործակցութեամբ: